من سوالف يدتي ((جدتي)) للشاعر عبد الحمن الرفيع

[صدى الوجدان]

السلام عليكم ورحمه الله وبركاته

اخترت لكم اليووم شعر خليجي بالهجه البحرينيه او الخليجيه عن سوالف

جداتنا اول للشاعر عبد الرحمن الرفيع شاعر بحريني معرووف بشعره الفكاهي

يقول بن ارفيع في شعره ..


جدتي .. أمي العوده .. طيبه من نسوانه الأول ..

إقعديت مره معاها .. قلت لها: سولفي عن أول ..

أبي كم سالفة منك .. تذكرين أيامك أول ..

أوصفي لي شلون أهلها كانوا اكراه ولا أشكل ..

علميني اشلون زمانك كان مثل ما نشوف أو اكمل ..

اضحكت مني وقالت: هذي شي يا ولدي كمل ..

لا تذكرني ابزمان ليته بس اشويه طول ..

آه على أيامنا الأول !!!

كان أبوك العود يا ولدي لين لبس زين وتعدل ..

قلبي ما يتم في مكانه وعيني عنه ما اتحول ..

ولين مشى صرَت انعاله وانتفخ ثوبه الململ ..

ولين تحنحن أو تخنخن كل درايشنه اتقلقل ..

كان يبل .. له هيبه حلوه ولين ضحك ويهه ايتهلل ..

موب مثل سبلان زمانكم هالرخو اللي ايتدلل ..

كشه الراس جنها عشه هذي راس واحد امخبل ..

يصلح الواحد من ذوله في الدكاكين والله سمبل ..

قلت بعد يا يده باسأل قالت: اشقد تسأل ..

قلت لها: يوم كنتي شابه اضغيره قط حبيتي أحد ..

اضحكت وايد أو تمت تنتفض والدنيا موب برد ..

قالت: استغفر من الله لا تكفر بالهيس الآربد .. (وايد سمعتها من يدتي هههههه)

كانت البنت في زمانه في السكيك مول ما اتردد ..

لو اطلعت من بيتها مره في السنة اتروح اتحمد ..

ولو اطبقوها من الدريشه اتطل من الخوف اتبريد ..

موب مثل أيامنا هذي تمشي في السوق واتصيد ..

قلت لها: اشكان يهازج وكم دفع في مهرك الجد ..

قالت: اشويه ربابي ما اتعده ترسه اليد ..

والجهاز كان بقشه عوده كل شي فيها امكود ..

فيها دفه أم عمايل صوف من اللماع الأسود ..

وثوب نشل وامحله كله ازري صج ما يتيعد ..

وفيها ميداسين وملفع نغده من يرَع امورد ..

والمشط سيسم اضروسه ما اتعوه وما اتمدد ..

وقالبين صابون بناتي اللي ريحته ريحة الورد ..

وحنه عيار في خريطه وتوله دهن عود وأزيد ..

قلت لها: هذه جهازج يدتي .. قالت: انا اشهد ..

قلت لها: يا يده سولفي لي عن الليلة العظيمه ..

ليلة الزفة اللي راحت وأصبحت أخبار قديمه ..

قالت: الزفة خذوني مريم وبنه وحليمه ..

في وسط زولية حمره بالغصب جني يتيمه ..

وقالوا: اسم الله عليها وهالحسن الله يديمه ..

ودخلوني الفرشه وانا خايفه خوف الله عليمه ..

العروس ف أيامنا كانت تستحي وعاقلة وفطينه ..

والعروس ف أيامنا هذي تقبض الزوج من يمينه ..

رافعة راسها كانه فوق وييها جلود متينه ..

وتمشي مستانسه وتضحك ولين تعب زوجها تعينه ..

قلت لها: هذي تمدن و كل زمان سلكه وافنونه ..

قالت: اي سلك واي تمدن كلنا من نفس العجينه ..

يدتي ماتدري عني إن لي أيام حسينه ..

ما كأني في زماني في الفريج كنت اتمشى ..

شاربي كان توه طالع والشعر فوق راسي كشه ..

والبنات من كل دريشه وكل أجاسي ما تغشه ..

هذي تضربني ابعنقيشه وهي تحذفني ابغرشه ..

وانا ماشي في طريقي ما ارتعش مول حتى رعشه ..

هذي سالفه من سوالف يدتي الطيبة الوحيده ..

قلت لكم منها وباكر اللي يبي الزود بانزيده ..

-------------------------------------------------------
معاني المفردات حق اللي ما فهمها: http://www.alhnuf.com/vb/images/smilies/biggrin.gif

صرت: طلعت صوت
تخنخن: تعطر .. اتقلقل: تهتز
يبل: جبل
سبلان جمع سبال: شاذي او قرد
سمبل: منيكان ينعرض عليه البضاعه.. باترينه
الدريشه: النافذه .. اتبريد: ترتجف من الخوف
يهازج : جهاز المره او المهر مع الدزة
بقشه: قطعة قماش كبيره تضع فيها الاغراض
امكود: متروس .. وايد
ملفع: شيله .. وشاح
اتعوه: ماتصير عوجه
زوليه: سجاده .. فرش .. موكيت
اجاسي: تطالع
تغشه: ما تغطي وجها .. اتنقب او اتبرقع
غرشه: زجاجه

[الوادي]

شكرا جزيلا ام عبود وانا من معجبي هذا الشاعر المبدع عبد الرحمن الرفيع ودمتي بود

[صدى الوجدان]

العفوو اخوي الوادي وعبد الرحمن الرفيع شاعر معرووف بشعره وكلماته

الخليجيه والبحرينيه بحت يسلمووو على المرور الطيب

[ابوسالم]

الشاعر عبدالرحمن الرفيع شاعر وضع له بصمة مميزة في سماء الشعر العامي والفصيح معا، شاعر له احساس مميز ينفرد به عن غيره من شعراء جيله، شاعر له اسلوب راقٍ يمزج فيه الجدية مع الفكاهة في صورة قد نقول ان التاريخ لم يعرف مثلها شاعر، صور كثيرا من لحظات حياته باسلوب مذهل.

شكرااختي ام عبود (المميزة) على هذا النقل من قصائد الشاعر
مع تقبل مروري